TIRANË, 7 tetor/ATSH/ Presidenti i Republikës, Bajram Begaj, reagoi sot, nëpërmjet një postimi në rrjetin social X, ndaj sulmit terrorist ndaj Izraelit.
Në reagimin e tij, Presidenti Begaj dënoi fuqishëm sulmet e Hamasit kundër Izraelit.
“Në këto momente, ne qëndrojmë krah Izraelit. Lutjet tona shkojnë për viktimat dhe familjet e tyre”, theksoi Begaj.
“Shqipëria është e vendosur kundër terrorizmit te çdo forme”, u shpreh Kreu i Shtetit.
Ushtria izraelite ka shpallur gjendjen e luftës pas sulmeve masive sot në mëngjes ndaj Izraelit nga Rripi palestinez i Gazës.
Organizata militante Hamas nisi sulmet me qindra raketa dhe me infiltrimin e luftëtarëve të armatosur nga Rripi i Gazës në Izrael. Izraeli është kundërpërgjigjur dhe ka bombarduar Gazën.
