RIAD, 15 gusht /ATSH-AA/ – Neymar i është bashkuar klubit saudit Al Hilal nga Paris Saint-Germain.
“Unë jam këtu në Arabinë Saudite, unë jam HILALI”, u shpreh ylli 31-vjeçar në një video-mesazh në rrjetet sociale.
Kohëzgjatja dhe detajet financiare të marrëveshjes nuk u zbuluan.
Në një mesazh lamtumire, Nasser Al-Khelaifi, presidenti dhe shefi ekzekutiv i klubit Paris Saint-Germain, tha: “Është gjithmonë e vështirë t’i thuash lamtumirë një lojtari të mrekullueshëm si Neymar, një nga lojtarët më të mirë në botë”.
“Nuk do ta harroj kurrë ditën kur ai mbërriti në Paris Saint-Germain dhe çfarë ka kontribuar në klubin tonë dhe projektin tonë gjatë 6 viteve të fundit”, tha ai në faqen zyrtare të PSG-së.
Neymar ndihmoi PSG-në të arrinte finalen e parë të Ligës së Kampionëve të UEFA-s në vitin 2020. Ai gjithashtu ndihmoi Barcelonën të fitonte Ligën e Kampionëve në vitin 2015 dhe dy tituj të La Ligës spanjolle në 2015 dhe 2016. /os/
