TIRANË, 12 gusht/ ATSH/ Ministrja e Bujqësisë dhe Zhvillimit Rural, Frida Krifca përmes një reagimi në rrjetet sociale ka kujtuar ditën ndërkombëtare të rinisë, ndërsa ka theksuar mbështetjen e vazhdueshme të qeverisë për të rinjtë që merren me bujqësi.
Sipas saj, qeveria po ndjek politika për nxitjen e zhvillimit rural dhe afrimin e rinisë.
“Gëzuar Ditën Ndërkombëtare të Rinisë me disa nga të rinjtë tanë. I mbështesim vazhdimisht të rinjtë në bujqësi me politikat tona për nxitjen e zhvillimit rural për afrimin e rinisë me fshatin dhe punën në bujqësi, blegtori, akuakulturë dhe agroturizëm. Bashkë për Bujqësinë! Bashkë për Shqipërinë”, shkruan Krifca.
Në postimin e saj janë disa të rinjë të angazhuar në bujqësi në fusha të ndryshme, si Elio Zaka nga Divjaka, Klemend Kojdheli nga Llakatundi, Vlorë, apo Ambuela Mema nga Ndroqi i Tiranës.
