TIRANË, 2 gusht /ATSH/ Kreu i Partisë Demokratike Lulzim Basha zhvilloi këtë të mërkurë një takim me drejtuesit politikë të qarkut të Vlorës, ku u bëri me dije se selia blu do të kërkojë hetim parlamentar për fondet IPARD.
Takimi, bën të ditur Basha përmes rrjeteve sociale, vjen në kuadër të punës për riorganizimin e selisë blu.
“Në Vlorë, me drejtuesit politikë të këtij Qarku, nisëm punën për riorganizimin dhe modernizimin e Partisë Demokratike dhe aksionin politik, për t’u ofruar shqiptarëve një opozitë të fortë, efikase dhe alternativën që ata presin dhe meritojnë”, deklaron Basha.
“Qytetarë të varfër, korrupsion i lartë. Ky është realiteti që u pa edhe nga Dosja e Inceneratorëve ku qeveria është përgjegjëse për vjedhjen e 430 milionë eurove nga xhepat e qytetarëve”, vijon Basha.
Kreu i Partisë Demokratike tha se do të kërkohet dhe hetim parlamentar për fondet IPARD.
“Vendimi i Brukselit për pezullimin e granteve për bujqësinë të programit IPARD tregon babëzinë e kësaj qeverie, që abuzon edhe me fondet e BE.
Prandaj ne do të kërkojmë: Hetim parlamentar të fondeve IPARD, ku paratë e taksapaguesve europianë u devijuan për projekte dhe afera korruptive.
Fundi i pandëshkueshmërisë së korrupsionit në nivelet e larta është fillimi i fundit të tranzicionit dhe ndryshimi i vërtetë që shqiptarët presin”, nënvizon Basha.
/r.e/
