TIRANË, 18 prill/ATSH/ Agjencia Kombëtare e Burimeve Natyrore (AKBN) po merr pjesë në takimin e grupit të punës për Statistikat e Energjisë, me vendet e Bashkimit Europian dhe vendet kandidate të organizuar nga EUROSTAT, në Luksemburg.
Agjencia Kombëtare e Burimeve Natyrore, si institucion që përgatit bilancin kombëtar të energjisë, përfaqësohet në këtë takim nga drejtori ekzekutiv, Adrian Bylyku.
Në nisje të takimit u prezantuan amendimet e rregullave të përmirësimit të të dhënave të energjisë për vitin 2023, ku EUROSTAT do të përqendrohet në problematikat e të dhënave të energjisë, si dhe do të paraqesë komentet për përmirësimin e tyre.
Më pas do të paraqiten zhvillimet më të fundit të politikës energjetike në BE si dhe propozime legjislative.
Agjencia Ndërkombëtare e Energjisë do të prezantojë zhvillimet e energjisë në mbarë botën si dhe statistikat e energjisë në kontekstin global.
Gjithashtu do të diskutohet me vendet pjesëmarrëse, zhvillimet si dhe pikat që propozohen të ndryshojnë në rregulloren e statistikave të energjisë.
/r.e/
