TIRANË, 27 mars/ATSH/ Kryetarja e Kuvendit, Lindita Nikolla dënoi sot sulmin ndaj televizionit “Top Channel”, ku si pasojë e të shtënave me armë nga persona të paidentifikuar humbi jetën roja i sigurisë, Pal Kola.
Nikolla u shpreh se, “sulmi me armë ndaj televizionit kombëtar “Top Channel” dhe vrasja e një prej personelit të sigurisë është një ngjarje e rëndë, që kërkon veprim të menjëhershëm e profesional nga agjencitë ligjzbatuese”.
“Solidaritet për TV ‘Top Channel’ dhe ngushëllime familjes Kola. Të zbardhet sa më shpejt kjo ngjarje kriminale”, u shpreh Nikolla.
Rreth orës 01:00 të pasmesnatës së të dielës, persona ende të paidentifikuar kanë qëlluar me armë zjarri në drejtim të ambienteve të “Top Channel”. Si pasojë e të shtënave humbi jetën roja i sigurisë, shtetasi P. K., 60 vjeç (punonjës i një shoqërie për ruajtjen fizike të objekteve).
/m.m/ /gj.m/
