TIRANË, 13 shkurt/ATSH – I. Vata/ Kryetari i grupit parlamentar të Partisë Socialiste Taulant Balla deklaroi sot në Kuvend se, protestat e opozitës janë presion kundër drejtësisë dhe SPAK për “21 Janarin’ dhe “Gërdecin”.
Në fjalën e tij në Kuvend, Balla tha se, “në momentin që SPAK është nën presionin e publikut për të marrë në dorëzim çështjen e vrasjeve shtetërore të 21 Janarit, përsëri arsyeja e bllokimit është kjo. Nuk ka të bëjë me agjentin e FBI-së McGonigal, as me drejtësinë amerikane. Mos ia qani hallin drejtësisë amerikane. Drejtësia amerikane do ta bëjë punën e vet. Ky është një presion i poshtër kundër drejtësisë shqiptare, kundër SPAK, për “Gërdecin” dhe “21 Janarin””. Po ashtu, për çështjen e gjyqit të PD-së në 3 mars. Megjithatë kjo nuk e ndërpret punën e Kuvendit të Shqipërisë. Kuvendi do duhet të marrë masa ndëshkimore jo vetëm për bllokimin e foltores, por edhe për fyerje seksiste”, tha Balla.
Balla, si kryetar i grupit parlamentar të Partisë Socialiste propozoi mbylljen e seancës së Kuvendit.
“Në këto kushte i propozoj Kuvendit ndërprerjen e seancës dhe ne do t’i drejtohemi për masa të tjera. Hallin e Sali Berishës me drejtësinë nuk e zgjidh as bilbili, as koka e bilbilit”, theksoi ai.
/gj.m/r.e/
