TIRANË, 8 janar /ATSH/ Kryeministri Edi Rama ndau sot në rrjetet sociale një video me pamje nga fauna në Parkun Kombëtar Divjakë-Karavasta.
Rama u shpreh se në Parkun Kombëtar Divjakë-Karavasta natyra vepron sipas dëshirës së saj dhe fauna dhe flora mbrohen nga specialistët e Agjencisë Kombëtare të Zonave të Mbrojtura.
“Ju ftoj të shijoni këto pamje të paqta në këtë fillimviti nga fauna në Parkun Kombëtar Divjakë-Karavasta. Aty ku natyra vepron sipas dëshirës së saj dhe ku fauna dhe flora mbrohen nga specialistët e Agjencisë Kombëtare të Zonave të Mbrojtura”, shkroi Rama në postimin e tij.
Parku Kombëtar Divjakë-Karavasta është një nga destinacionet më të preferuara për argëtim, qetësi dhe pushim gjatë fundjavës për qindra qytetarë që e frekuentojnë në çdo stinë.
Përveç natyrës, parku kombëtar u ofron qytetarëve edhe “shoqërinë” e specieve të rralla dhe të veçanta që ndodhen në këtë park si pelikani kaçurrel, apo edhe gjitari globalisht i kërcënuar – lundërza (Lutra lutra), çakalli, dhelpra, baldosa, dallëndyshja e detit, por edhe disa lloje të rralla pishash.
Në parkun kombëtar Divjakë-Karavasta gjenden edhe delta lumenjsh, laguna, duna ranore dhe bimësi e rrallë, çka e bën këtë park një ndër më të rëndësishmit në Mesdhe.
