TIRANË, 10 dhjetor/ATSH/ Kryetari i Komisionit Parlamentar të Ekonomisë dhe Financave, Eduart Shalsi mori pjesë në takimin e komitetit drejtues të Asamblesë Parlamentare të Procesit të Bashkëpunimit të Evropës Juglindore, në Podgoricë, Mal i Zi.
Shalsi ishte i pranishëm në cilësinë e kryetarit të delegacionit të Kuvendit të Shqipërisë në SEECP.
Ky takim u zhvillua në kuadër të presidencës së Malit të Zi të kësaj organizate.
Shalsi bëri të ditur se gjatë takimit u diskutua mbi prioritetet e Presidencës, si bashkëpunimi rajonal, konektiviteti dhe integrimi i rajonit në BE.
“Për një ndër temat e agjendës në lidhje me selinë e sekretariatit të Asamblesë, dhe funksionimin e saj të plotë, një çështje e pazgjidhur prej shumë vitesh, inkurajova dhe propozova një zgjidhje të përkohshme që do të mund të ndihmojë me ngërçin e krijuar”, informoi ai.
