TIRANË, 30 tetor/ATSH/ Në qytetin e Gjirokastrës ka nisur vaksinimi falas kundër gripit stinor, i garantuar nga Ministria e Shëndetësisë dhe Mbrojtjes Sociale .
Lajmi u bë i ditur nga MSHMS, e cila thekson se “kombinimi i vaksinës së gripit dhe vaksinës kundër COVID-19 rekomandohet gjatë muajve të dimrit për imunizimin e personave me risk të lartë”.
Kjo vaksinë rekomandohet për grupmoshat mbi 60 vjeç, personelin shëndetësor, gratë shtatzëna si dhe personat me sëmundje kronike.
MSHMS i bën apel qytetarëve të kontaktojnë mjekun e familjes për t’u mbrojtur nga gripi sezonal dhe COVID-19.
Sipas MSHMS, 270 mijë doza të vaksinave kundër gripit tashmë kanë mbërritur dhe po shpërndahen në gjithë qendrat shëndetësore anë e mbanë vendit.
Në qendrat shëndetësore në të gjithë vendin ka nisur prej 27 tetorit vaksinimi falas kundër gripit stinor, i cili do të kombinohet njëherësh me vaksinën përforcuese kundër COVID-19.
/k.s/
