PRISHTINË, 21 gusht /ATSH/ Ka përfunduar takimi mes presidentit të Serbisë, Aleksandër Vuçiç dhe përfaqësuesve të serbëve nga Kosova, ku është diskutuar për negociatat e zhvilluara në Bruksel.
Në takimin që u mbajt në Beograd, morën pjesë edhe kryeministrja Ana Brnabiq, ministri i Financave, Sinisha Mali, drejtori i Zyrës së ashtuquajtur për Kosovë, Petar Petkoviq, kryetari i Listës Serbe, Goran Rakiq, nënkryetarët e LS, Igor Simiq, Dalibor Jevtiq, Milan Radoiçiç dhe kryetarë komunash nga veriu i Kosovës.
Pas takimit me përfaqësuesit e serbëve nuk pati deklaratë për media, por Vuçiç pritet të mbajë një adresim drejtuar kombit më vonë gjatë ditës.
Vuçiç tha të enjten nga Brukseli se ishte një ditë e vështirë për Serbinë dhe se ai do të vazhdojë të luftojë për paqe dhe stabilitet.
Drejtori i Zyrës së ashtuquajtur për Kosovën, Petar Petkoviq, duke paralajmëruar fjalimin e presidentit, tha se do të jetë “një nga fjalimet e tij më të rëndësishme”, në të cilën do të flasë për sjelljen e Kurtit në Bruksel, si dhe për situatën aktuale, dialogun dhe propozimet.
