MOSKE, 21 korrik /ATSH-DPA/ – Moska deklaroi se po zgjeron planet e saj për të marrë territorin ukrainas përtej Donbasit Lindor, në përgjigje të rritjes së furnizimeve perëndimore me armë nga Kievi, ndërsa pushtimi rus i fqinjit të saj po i afrohet pesë muajve.
”Rusia planifikon të pushtojë më shumë territor ukrainas sepse dërgimi i armëve perëndimore me rreze të gjatë në Kiev ndryshoi gjeografinë e betejës”, deklaroi ministri i Jashtëm rus, Sergei Lavrov.
“Procesi do të vazhdojë. Do të jetë drejt një qëllimi dhe me presion”, i tha ai transmetuesit rus RT.
Ai shtoi se ”meqenëse Ukraina tani ka armë nga Perëndimi që e lejojnë atë të godasë në distanca deri në 300 kilometra, ishte e nevojshme t’i shtynte ato më tej për të minimizuar rreziqet për forcat ruse”.
“Gjeografia është e ndryshme tani”, thekoi Lavrov duke shtuar se Rusia nuk ishte më e fokusuar vetëm në rajonin e Donbass ose rajonet jugore të Ukrainës, Kherson dhe Zaporizhzhya, por në një numër territoresh të tjera”.
Një nga qëllimet fillestare të pushtimit rus ishte çmilitarizimi i Ukrainës.
Ministri i Jashtëm ukrainas Dmytro Kuleba u përgjigj menjëherë duke thënë se Rusia është më e interesuar për gjakderdhjen sesa për të gjetur një mënyrë për t’i dhënë fund luftimeve.
“Duke rrëfyer ëndrrat për të rrëmbyer më shumë tokë ukrainase, ministri i Jashtëm rus demonstron se Rusia kundërshton diplomacinë dhe fokusohet në luftë dhe terror. Rusët duan gjak, jo bisedime”, shkroi Kuleba në Twitter./ /os/
