TIRANË, 18 korrik /ATSH/ Komisioni për Punën, Çështjet Sociale dhe Shëndetësinë, në cilësinë e komisionit për dhënie mendimi mori në shqyrtim projektligjin “Per regjistrin kombetar te te denuarve per krime seksuale”.
Projektligji u prezantua nga nënkryetarja e Kuvendit, Ermonela Felaj dhe Erisa Xhixho, në cilësinë e deputetes propozuese të këtij projektligji.
Felaj theksoi se, kjo është hera e parë që të dhënat për personat e dënuar do të mblidhen në rang kombëtar.
“Është e para herë që mundësojmë që të dhënat për personat e dënuar në vite për kryejnë e krimeve seksuale kemi vendosur të mblidhen në rang kombëtar. Përmes kësaj të dhëne na jep mundësinë të dimë shpërndarjen e këtyre personave. Nuk ka rëndësi fakti nëse janë rehabilituar apo jo. Qëllimi është ai që edhe gjykatat evropiane e kanë konsideruar të rëndësishëm”, tha Felaj.
Pas pyetjeve dhe sugjerimeve anëtarët miratuan në parim nen për nen dhe në tërësi projektligjin në fjalë.
/j.p/
