STAMBOLL, 30 qershor /ATSH-DPA/- Autoriteti i Transmetimeve Turke (RTUK) ka bllokuar faqet e internetit të transmetuesit gjerman ”Deutsche Welle” (DW) dhe ato të radiostacionit ndërkombëtar amerikan ”Zëri i Amerikës” (VOA).
Kryetari i RTUK, Ilhan Tasci, shkroi në Twitter se aksesi i të dy transmetuesve u bllokua me urdhër të gjykatës dhe me kërkesë të RTUK.
Tasci tha se ato nuk kishin aplikuar për licensa.
DW konfirmoi se aksesi ishte bllokuar në të gjitha 32 faqet e saj në gjuhë të ndryshme që nga mbrëmja e së enjtes.
”Zëri i Amerikës” konfirmoi gjithashtu se rregullatori turk i medias kishte bllokuar aksesin e transmetuesit të tij.
DW dhe media të tjera të huaja janë kërcënuar se programet e tyre online në Turqi do të bllokoheshin që nga shkurti, kur RTUK u kërkoi zyrtarisht transmetuesve të aplikonin për licensë për shërbime sipas kërkesës.
DW tha se do të ndërmarrte veprime ligjore kundër kërkesës dhe se do të ngrinte padin për heqjen e bllokimit. Në median sociale po shpërndaheshin informacione sesi të anashkaloheshin kufizimet./ /a.i/
