KIEV, 9 qershor /ATSH-ANSA/ – Bota duhet të ndalojë agresionin e Rusisë që është një kërcënim për të gjithë botën, deklaroi presidenti ukrainas, Volodymyr Zelensky, duke folur në këshillin ministror të OECD-së, të kryesuar këtë vit nga Italia.
Fjalimi i Zelensky u përshëndet me duartrokitje nga delegacionet e pranishme.
Nga ana e tij, sekretari i përgjithshëm i OECD, Mathias Cormann, përshëndeti “forcën dhe guximin” e Zelenskyt dhe pranoi ftesën e presidentit ukrainas për ta takuar atë në zyrën e OECD në Kiev.
“Jam mirënjohës për punën që po bëni për të mbrojtur vlerat tona. Ndërprerja e anëtarësimit të Rusisë në OECD duke mbyllur zyrat tuaja në Moskë duhet të jetë shembull për institucionet e tjera ndërkombëtare”, theksoi Zelensky.
“Ne duhet të përdorim të gjitha mjetet që kemi për të ushtruar presion mbi Rusinë dhe për të ndaluar politikat e saj agresive’’, shtoi ai.
”Rusia është një kërcënim për të gjithë botën. Hapja e zyrës së OECD në Kiev është një sinjal i rëndësishëm dhe falënderoj presidentin Cormann për këtë vendim’’, shtoi ai. /os/
