BRUKSEL, 28 mars /ATSH-DPA/ – Komisioni Evropian u bëri thirrje vendeve anëtare të BE-së që të tërheqin shtetësinë e BE-së, përmes skemës së ”pasaportave të arta”, që u jepen individëve rusë dhe bjellorusë nën sanksione.
”Rusët dhe bjellorusët nën sanksione dhe ata që mbështesin luftën e Putinit nuk mund të blejnë rrugën e tyre drejt BE-së”, tha në një deklaratë komisionerja e BE-së për Çështjet e Brendshme, Ylva Johansson.
Bashkimi Evropian miratoi sanksione masive ekonomike që synojnë oligarkët, politikanët dhe liderët e biznesit në përgjigje të pushtimit rus të Ukrainës, përfshirë ndalimin e udhëtimit dhe ngrirjen e aseteve në BE.
Një person mund të marrë nënshtetësinë e një vendi të BE-së në këmbim të investimeve të rëndësishme.
Skemat e qëndrimit të investitorëve lejojnë një individ të marrë një leje qëndrimi për një vend të BE-së në këmbim të investimit ose pagesës.
Ekzekutivi i BE-së po u kërkon qeverive të BE-së që t’i japin fund të dyja politikave.
Komisioneri i Drejtësisë i BE-së Didier Reynders tha në një deklaratë se skemat e investimeve paraqesin rreziqe serioze të sigurisë dhe hapin “derën për korrupsionin, pastrimin e parave dhe shmangien e taksave”.
Komisioni ka nisur tashmë procedurat ligjore kundër Maltës dhe Qipros për ofrimin e skemave të tilla.
Ekzekutivi i BE-së u bëri thirrje gjithashtu vendeve anëtare të BE-së të pezullojnë çështjen e lejeve të qëndrimit sipas skemave të investimeve për të gjithë shtetasit rusë dhe bjellorusë, pavarësisht nëse ata janë subjekt i sanksioneve./ a.jor.
