SIDNEJ, 13 shkurt /ATSH-DPA/- Qeveria australiane ka pezulluar përkohësisht operacionet në ambasadën e saj në Kiev për shkak të shqetësimeve në rritje për një pushtim të mundshëm rus.
“Duke pasur parasysh përkeqësimin e situatës së sigurisë të shkaktuar nga grumbullimi i trupave ruse në kufirin e Ukrainës, qeveria ka urdhëruar largimin e stafit të ambasadës australiane në Kiev dhe ka pezulluar përkohësisht operacionet në ambasadën tonë në Kiev”, njoftoi sot ministrja e Jashtme Marise Payne.
Payne tha se operacionet e ambasadës do të zhvendoseshin përkohësisht në qytetin ukrainas të Lviv, që ndodhet më në perëndim se kryeqyteti pranë kufirit me Poloninë.
Një ditë më parë, qeveria australiane paralajmëroi qytetarët e saj në Ukrainë që të largohen menjëherë nga vendi.
Shtetet e Bashkuara i kanë bërë thirrje stafit të tyre në Organizatën për Siguri dhe Bashkëpunim në Evropë të largohen. Rregullat e udhëtimit të njoftuara për qytetarët amerikanë javën e kaluar vlejnë gjithashtu për stafin e OSBE-së, tha të shtunën një zëdhënës i Departamentit të Shtetit në SHBA. //a.i/
