TIRANË, 2 shkurt /ATSH/ Komisioni për Ekonominë dhe Financat, diskutoi sot projektligjin “Për mbështetjen dhe zhvillimin e startup-eve”.
E ftuar për prezantimin e këtij projekti ishte Edona Bilali, ministre e Shtetit për Mbrojtjen e Sipërmarrjes.
Në parashtrimin përpara komisionit, ministrja Bilali shpjegoi se, qëllimi i këtij ligji është krijimi i një kuadri rregullator dhe institucional të favorshëm për krijimin e zhvillimin e startup-eve dhe mbështetjen e ekosistemit, për nxitjen e kërkimit, realizimit dhe përdorimit të ideve, modeleve, produkteve dhe proceseve të reja, të cilat sjellin risi në çdo fushë.
“Objektivat që synohen të arrihen janë zbatimi i mekanizmave mbështetës për krijimin e zhvillimin e startup-eve të reja, duke nxitur krijimin e një mjedisi të favorshëm dhe duke synuar thithjen e aktorëve që mungojnë aktualisht, kryesisht të subjekteve që ofrojnë inkubim, mentorim e financim të startup-eve të reja”, sqaroi më tej ministrja Bilali.
Kryetari i Komisionit Eduart Shalsi, njoftoi se, për këtë projekt do të ketë një seancë tjetër shqyrtimi, pyetjesh dhe diskutimesh, në lidhje me projektligjin pasi komisioni të marrë dhe komentet e diskutimeve në komisionet e tjera.
Objektivat që synohen të arrihen përmes miratimit të këtij projektligji dhe zbatimit të tij janë: përcaktimi i lehtësirave fiskale, i programeve dhe masave që mbështesin startup-et në fazën fillestare të biznesit (periudha e inkubimit) dhe mbështetjen e ekosistemit për të krijuar një klimë të favorshme për to në Republikën e Shqipërisë; organet shtetërore, të cilat ngarkohen me detyrat e kompetencat për mbështetjen e startup-eve si dhe përcaktimin e kritereve, rregullave dhe procedurat që zbatohen për certifikimin, mbështetjen, vlerësimin e monitorimin e startup-eve. /j.p/
