TIRANË, 22 dhjetor/ATSH/ Zëvendësdrejtori i Përgjithshëm i Policisë së Shtetit, drejtues i lartë Albert Dervishaj, i shoqëruar nga koordinatori kombëtar për SEPCA-n, mori pjesë në Asamblenë e Përgjithshme të Shoqatës së shefave të Policisë të vendeve të Evropës Juglindore (SEPCA).
Punimet e Asamblesë u drejtuan nga drejtori i Përgjithshëm i Policisë së Malit të Zi, Zoran Brdjanin, i cili është edhe drejtuesi aktual i SEPCA-s.
Gjatë punimeve të Asamblesë u diskutua për forcimin e bashkëpunimit policor, duke lehtësuar partneritetin rajonal dhe bashkëpunimin ndërinstitucional.
Në përfundim të punimeve, Asambleja vendosi që presidenca e radhës e SEPCA-s t’i kalojë Policisë rumune.
Shoqata e shefave të Policisë të Evropës Juglindore është formuar në Pula të Kroacisë, në janar të vitit 2002, me bazë vullnetare, si rrjeti më i lartë profesional policor i përbërë nga shefat e Policisë të vendeve të Evropës Juglindore. /j.p/
