TIRANË, 21 dhjetor /ATSH/ Partia Demokratike kallëzon penalisht Fatjon Dautin, personin që shoqëronte ish-kryeministrin Sali Berisha, i cili ndërmori akte dhune në selinë e Partisë Demokratike.
Me anë të një njoftimi PD thekson se, “pas analizimit të pamjeve filmike rezulton se i urdhëruar nga deputeti Flamur Noka, shtetasi Fatjon Dauti, person me precedentë të rëndë kriminal, që shoqëronte Sali Berishën, ka dhunuar ambientet e selisë qendrore të Partisë Demokratike”.
PD nënvizon se, “sipas Ministrisë së Brendshme dhe Agjencisë Kombëtare të Krimit në Britaninë e Madhe, shtetasi Fatjon Dauti është cilësuar person i aftë për dhunë ekstreme dhe një anëtar me ndikim në një rrjet kriminal shqiptar me qendër në Londër i përfshirë në importimin e kokainës, prodhimin e kanabisit, trafikim të njerëzve dhe pastrimit të parave”.
