TIRANË, 17 dhjetor/ATSH/ Të ardhurat e mbledhura nga Administrata Doganore gjatë periudhës janar-nëntor 2021 arritën 172.6 miliardë lekë, nga 153.5 miliardë lekë të planifikuara.
Sipas statistikave zyrtare të publikuara nga Drejtoria e Përgjithshme e Doganave, të ardhurat e mbledhura në buxhet rezultojnë rreth 19 miliardë lekë më të larta sesa plani.
“Në krahasim me rritjen totale të fluksit të importit, rritja e të ardhura nga çmimet ndërkombëtare zë vetëm 21 % të rritjes totale të vlerës statistikore. Pra 79 % e suksesit të të ardhurave vjen si rrjedhojë e rritjes ekonomike, rritjes së fluksit të importit dhe mirëadministrimit, ndërsa 21 % si rrjedhojë e efektit të çmimeve”, bën të ditur DPD.
Sipas DPD-së, efekti negativ nga rënia e kursit të këmbimit të euros llogaritet 3 miliardë lekë.
“Rritja e të ardhurave doganore në total është rreth 2 herë më shumë se rritja ekonomike e përllogaritur nga INSTAT”, thekson DPD.
Në krahasim me 11 mujorin e 2020-ës janë realizuar rreth 48.8 miliardë lekë më shumë.
Dogana informoi se njëmbëdhjetëmujori i 2021-shit ka realizimin më të lartë të çdo 11-mujori në historinë e doganave, duke kaluar edhe të ardhurat e 11-mujorit të vitit 2019-ë.
/a.a/r.e/
