SARAJEVË, 11 dhjetor /ATSH-DPA/-Parlamenti i pjesës serbe të Bosnjë-Hercegovinës, Republika Srpska, vendosi të premten të transferojë pushtetet nga niveli shtetëror, në një lëvizje që rrezikon të nxisë konfliktin.
Media boshnjake raportoi se legjislatura rajonale votoi për t’i hequr pushtetin shtetit në fushat e taksave, drejtësisë, sigurisë dhe mbrojtjes, pavarësisht se komuniteti ndërkombëtar kishte paralajmëruar kundër një lëvizje të tillë.
Milorad Dodik, kreu i partisë SNDS dhe anëtar serb i Presidencës së Bosnje dhe Hercegovinës, ishte forca shtytëse pas nismës.
Është ende e paqartë nëse ai do të ndjekë planet për të krijuar një ushtri të veçantë për Republikën Srpska.
Opozita bojkotoi pothuajse tërësisht votimin në parlamentin e Banja Lukës. Megjithatë, propozimi i partisë së Dodik fitoi një shumicë të qartë me 49 vota pro.
Dodik njoftoi se brenda gjashtë muajve do të nisë legjislacionin për riorganizimin e zonave për të cilat shteti qendror nuk ka më juridiksion.
Në tetor, parlamenti serb vendosi të shkëputet nga autoriteti qendror i barnave. Si rezultat, Zyra e Prokurorit të Lartë të kryeqytetit Sarajevë nisi një hetim për të dyshuar “shkelje të rendit kushtetues të Bosnje-Hercegovinës”.
Dodik ka vite që kërcënon se do ta ndajë Republikën Srpska nga shteti boshnjak. Bosnje-Hercegovina nuk është gjë tjetër veçse “një republikë letre,” i tha Dodik parlamentit në Banja Luka.
Dodik kërcënon të shkatërrojë arkitekturën e Marrëveshjes së Paqes të Dejtonit të vitit 1995. Kjo i dha fund më shumë se tre viteve të luftës midis serbëve, kroatëve dhe boshnjakëve. /os/
