TIRANË, 9 dhjetor /ATSH/ Banka e Shqipërisë bën të ditur se, kredia e re për blerjen e pasurive të paluajtshme nga biznesi në fund të muajit tetor të këtij viti, kishte vlerën e rreth 23.6 miliardë lekëve.
Sipas BSH-së, krahasuar me 10-mujorin e parë të vitit 2020 kredia e re për blerjen e pasurive të paluajtshme u rrit me 3 %.
Ekspertët vlerësojnë se, tendenca në rritje për të investuar në pasuri të paluajtshme, evidente tek individët, ka përfshirë vitet e fundit edhe bizneset.
Normat e ulëta të interesit të kredisë, e kanë bërë më të lirë huadhënien nga bankat dhe koston e investimit për të blerë ose ndërtuar një pasuri të paluajtshme.
Dinamika më e zhvilluar për blerjen e pasurive të paluajtshme vihet re kryesisht në zonat bregdetare dhe në kryeqytet.
/r.e/
