Në një njoftim për shtyp AZHBR-ja bën të ditur se, “pjesëmarrësit në qarkun e Tiranës, Durrësit, Beratit dhe Gjirokastrës, u njohën mbi etapat që duhen ndjekur për të apeluar në AZHBR vendimet e projekteve të refuzuara”.
Drejtoresha e AZHBR, Eranda Selmanaj, tha se “rëndësia e këtyre takimeve është esenciale për të sqaruar aplikantët dhe fermerët e interesuar edhe për thirrjet e ardhshme dhe kriteret që duhen zbatuar me rigorozitet për të patur sa më pak keqkuptime në aplikime”.
Sipas saj, fondet e Bashkimit Evropian përmes programit IPARD-II, sollën në Shqipëri një interes të ri për ngritjen e nivelit të prodhimit dhe cilësisë së produkteve vendase, duke angazhuar fermerët në zgjerimin dhe diversifikimin e biznesit në zonat rurale.
Takimet do të vazhdojnë edhe në qarqet e tjera për të informuar dhe sqaruar të interesuarit për të drejtën e tyre të ankimimit, përmes një prezantimi të detajuar nga stafi i AZHBR, që përfshin të trija thirrjet dhe të gjitha masat e sektorët e investimeve.
/a.a/r.e/
