PRAGË, 2 nëntor /ATSH-DPA/ – Ndryshimi i afërt i qeverisë në Republikën Çeke nuk do ta vendosë vendin e Evropës Qendrore në një kurs më të shpejtë drejt adoptimit të euros, njoftuan sot partitë në negociata për një koalicion qeverisës.
“Një plan i tillë, për t’iu bashkuar monedhës së përbashkët evropiane, nuk do të ishte i dobishëm për vendin, tani për tani”, thanë përfaqësuesit, sipas agjencisë së lajmeve CTK.
“Republika Çeke, gjithashtu, nuk i përmbush ende kriteret e deficitit për futjen e euros”, shpjeguan ata.
Dy aleanca opozitare fituan së bashku 108 nga 200 vendet në Dhomën e Përfaqësuesve në zgjedhjet e tetorit dhe njoftuan se do të formonin një qeveri të qendrës së djathtë.
Partitë janë ende duke përcaktuar bazat e marrëveshjes së tyre të koalicionit dhe strukturën e kabinetit të ardhshëm.
Për momentin, kryeministri populist Andrej Babis është ende në detyrë, pavarësisht humbjes së tij në zgjedhje./ /ervo/
