KALIFORNI, 29 tetor /ATSH-ANSA/ – Ata që argumentojnë se lufta kundër ndryshimeve klimatike rrezikon të dëmtojë ekonominë janë budallenj ose gënjeshtarë, deklaroi ylli i Hollivudit, Arnold Schwarzenegger, në prag të samitit të G20-ës në Romë dhe në funksion të COP26, duke u bërë një apel liderëve botërorë.
Në një intervistë për BBC, ish-guvernatori i Kalifornisë shprehu shqetësim të veçantë për ndotjen e ajrit dhe gazrat serrë nga anijet duke sugjeruar masa më efektive.
Aktori u bë i famshëm me sagën ”Terminator” dhe ka vite që merret me çështjet e mjedisit.
Nga viti 2003 deri në vitin 2011, kur ishte guvernator i Kalifornisë, ai nisi një sërë masash në favor të energjisë së rinovueshme duke vendosur synime për të reduktuar gazrat e shkarkimit dhe emetimet e gazrave serrë.
Gjithashtu kohët e fundit ai tha se ka ulur konsumin e mishit me rreth tre të katërtat.
”Meqenëse ha më shumë perime dhe bëj një dietë më vegjetariane, kardiologu im ka thënë se arteriet e mia kanë pushuar së tkurruri”, theksoi ai./ /os/
