TIRANË, 21 shtator/ATSH/ Në Kurbin është goditur një tjetër rast i kultivimit të bimëve narkotike, teksa janë vënë në pranga 2 shtetas, autorë të dyshuar të kultivimit të bimëve narkotike dhe është proceduar penalisht kryetari i fshatit, për shpërdorim detyre.
Shërbimet e Komisariatit të Policisë Kurbin, pas informacioneve të marra në rrugë operative se në fshatin Ferrë Trashë, Mamurras, Kurbin, po kultivoheshin bimë narkotike, kanë bërë arrestimin në flagrancë të shtetasve: P. M., 29 vjeç dhe M. M., 24 vjeç, banues në Ferrë Trashë, Mamurras.
Këta shtetas janë kapur në kushtet e flagrancës, duke kultivuar bimë narkotike në afërsi të banesës së tyre, në vendin e quajtur “Ferrë Trashë”, Njësia Administrative Mamurras, Kurbin.
Në vijim të veprimeve hetimore filloi procedimi penal në gjendje të lirë për shtetasin M. K., 59 vjeç, me detyrë kryetar i fshatit Ferrë Trashë, pasi dyshohet se ka konsumuar elementë të veprës penale “Shpërdorim detyre.
Materialet procedurale u referuan në Prokurorinë pranë Gjykatës së Shkallës së Parë Kurbin, për veprat penale “Kultivim i bimëve narkotike”, kryer në bashkëpunim dhe “Moskallëzimi i krimit “. /j.p/
