HAGË, 30 korrik /ATSH-AFP/ – Agjencia Evropiane e Barnave (EMA) miratoi sot intensifikimin e procesit të prodhimit të substancave aktive të vaksinës Moderna në dy vende në SHBA, që pritet të kenë një ndikim “domethënës” në furnizimin me vaksinat antiCOVID-19 brenda BE-së.
“Në tremujorin e tretë të vitit 2021, zinxhiri amerikan i furnizimit do të sigurojë 40 milionë doza të vaksinës për tregun evropian”, tha rregullatori evropian në një deklaratë.
Që nga dhënia e autorizimit të kushtëzuar të marketingut për vaksinën Spikevax (Moderna), Komiteti për Produktet Medicinale për Përdorim Njerëzor (CHMP) i EMA-s ka autorizuar katër vende prodhimi për prodhimin e substancave aktive për këtë vaksinë, dy në SHBA dhe dy në Visp, Zvicër.
“Ky vendim i EMA riafirmon se të dyja vendet janë të afta të prodhojnë vazhdimisht substanca aktive me cilësi të lartë”, theksoi agjensia.
Sipas Komisionit Evropian, këtë javë rreth 70% e popullsisë së rritur në BE kanë marrë të paktën një dozë të vaksinës COVID-19 dhe më shumë se gjysma e të rriturve (57%) janë plotësisht të vaksinuar./ /ervo/
