BOSTON, 5 korrik /ATSH-ANSA/ – Një studim i fundit ka treguar se prania e niveleve mjaft të larta të ankthit në popullatën e moshuar mund të përfaqësojë një tregues të hershëm të sëmundjes Alzheimer, shkruan faqja pazienti.it.
Ky është një zbulim i rëndësishëm, i cili mund të ndihmojë ekspertët për të identifikuar ata që janë potencialisht të rrezikuar nga çmenduria në këtë grupmoshë të veçantë.
Vlerësohet se në vitin 2017, sëmundja e Alzheimerit dhe sëmundjet neurologjike të lidhura përfshinin 50 milion njerëz në të gjithë botën.
Kjo patologji shkakton një rënie të ngadaltë të aftësive njohëse dhe të kujtesës, vështirësi në organizimin e mendimeve dhe, në fund të fundit, tërheqje dhe izolim shoqëror.
Aktualisht, nuk ka trajtime efektive të afta për të kundërvepruar me përparimin e sëmundjes.
Prandaj, të qenit në gjendje të identifikoni ndonjë shenjë paralajmëruese mund të ndihmojë në zbutjen e efekteve të tyre.
Një studim i botuar në ”Revistën Amerikane të Psikiatrisë” theksoi ekzistencën e beta amiloidit, një proteinë e përfshirë në zhvillimin e sëmundjes Alzheimer dhe, në veçanti, në shkatërrimin e sinapseve dhe nivelet e ankthit.
Studimi ekzaminoi rezultatet e marra nga një eksperiment pesëvjeçar, i kryer në një popullatë prej 270 subjektesh të moshuar, burra dhe gra, të moshës midis 62 dhe 90 vjeç, pa çrregullime aktive psikiatrike.
Sipas asaj që doli nga ky studim, një përkeqësim i simptomave të ankthit shoqërohej me nivele më të larta të beta amiloidit, proteina që, sipas studiuesve, identifikon sëmundjen e Alzheimerit./ /os/
