TIRANË, 22 qershor /ATSH – I. Vata/ Kryetari i Kuvendit, Gramoz Ruçi, priti Avokatin e Popullit të Kosovës, Naim Qelaj, i cili ndodhet në Shqipëri për takime zyrtare dhe pjesëmarrje ne veprimtari të përbashkëta të Avokatit të Popullit të Shqipërisë, Kosovës dhe Maqedonisë së Veriut.
Në takim merrte pjesë edhe Marija Radulovic, zëvendëse e Avokatit të Popullit të Kosovës, dhe Erinda Ballanca, Avokate e Popullit e Shqipërisë.
Nga ana e tij, Ruçi i uroi Avokatin e Popullit të Kosovës, Naim Qelaj sukses në detyrën në të cilën është zgjedhur nga Kuvendi i Kosovës dhe vlerësoi bashkëpunimin shumë të mirë midis institucioneve të Avokatit të Popullit të Shqipërisë dhe Kosovës dhe së fundi edhe me Maqedoninë e Veriut.
“Kosova ka përpara sfida shumë serioze dhe të mëdha për të ardhmen e saj, si konsolidimi i institucioneve, zhvillimi ekonomik dhe mirëqenia, dialogu me Serbinë, rritja e njohjeve ndërkombëtare dhe kontributi për paqen në rajon. Këto sfida mund, duhet dhe do të përballohen vetëm në partneritet dhe duke ndjekur vizionin e partnerëve të mëdhenj strategjik të shqiptarëve: SHBA dhe BE. Avokati i Popullit i Kosovës mund të zbusë në mënyrë horizontale e kapilare problemet e brendshme të shoqërisë kosovare, presionin për ndërtimin e shtetit të së drejtës dhe sundimit të ligjit, drejtësisë sociale, respektimin e lirive dhe të drejtave të njeriut, trajtimin e pakicave, rritjen e kontributit të Kosovës për formimin e paqes, mirëkuptimit e tolerancës në rajon etj.”, theksoi Ruçi.
Nga ana e tij, Naim Qelaj, Avokati i Popullit i Republikës së Kosovës, falenderoi Kryetarin e Kuvendit Ruçi për vlerësimet e larta për bashkëpunimin midis institucioneve të Avokatit të Popullit të të dy vendeve dhe vuri në dukje se roli i institucionit të Avokatit të Popullit në Kosovë vjen duke u fuqizuar dhe vëmendja e institucioneve shtetërore duke u rritur.
“Rekomandimet e Avokatit të Popullit janë në vëmendje edhe të Delegacionit të Bashkimit Europian në Prishtinë dhe zbatimi i tyre vlerësohet edhe si një tregues i rritjes së standardeve të të drejtave të njeriut në rrugëtimin europian të Kosovës”, theksoi Qelaj.
/j.p/r.e/
