BERLIN, 7 qershor /ATSH-AFP/ – Numri i personave që bëjnë një kërkesë fillestare për azil në Gjermani u rrit ndjeshëm në maj krahasuar me të njëjtin muaj të vitit të kaluar.
Sipas statistikave të botuara sot nga Zyra Federale për Migracionin dhe Refugjatët (BAMF), autoriteti mori 8 278 aplikime të reja nga personave që kërkojnë mbrojtje dhe 950 aplikime pasuese muajin e kaluar.
Një vit më parë, numri i aplikacioneve fillestare ishte dukshëm më i ulët, në 3 777 aplikime, megjithatë kufizimet e udhëtimit të paraqitura për shkak të pandemisë së COVID-19 qenë edhe më të rrepta atëherë.
Grupi më i madh i aplikantëve këtë maj ishin sirianë me 3 776 aplikime, ndërsa 1 594 nga Afganistani dhe 651 nga Iraku.
Në vitin 2020, 102 581 të huaj aplikuan për azil në Gjermani për herë të parë, midis tyre 26 520 aplikime për fëmijë nën moshën 1 vjeç, që kanë lindur në Gjermani.
“Në shumë raste, kjo ka të bëjë me migracionin ekonomik, jo më me ikjen nga rreziku”, tha politikani konservator Mathias Middelberg.
Ai paralajmëroi se numrat mund të rriten ndërsa më shumë persona po përpiqen të kalojnë Mesdheun nga Afrika e Veriut në Itali dhe Spanjë.
Sipas Agjencisë së KB-së për Refugjatët, 15 % e personave që mbërritën me anije në Itali në katër muajt e parë të këtij viti ishin tunizianë, ndërsa 13 % ishin shtetas të Bregut të Fildishtë dhe 10 % nga Bangladeshi.
Midis refugjatëve që mbërritën në Spanjë në vitin 2020, kishte veçanërisht shumë algjerianë dhe marokenë./ /ervo/
