TIRANË, 1 qershor/ATSH/ Ministria e Infrastrukturës dhe Energjisë ka hartuar projektvendimin mbi rregullat e reja për shërbimet e dërgesave të pakove postare ndërkufitare.
Në projektvendimin e MIE-s përcaktohen kërkesat specifike për nxitjen e ofrimit të shërbimeve më të mira postare për dërgesat ndërkufitare të pakove postare.
Sipas MIE-s, nevoja e këtij rregullimi lidhet me zhvillimin e tregtisë elektronike (e-commerce) përmes përmirësimit të shërbimeve postare ndërkufitare.
“Projektakti ka për qëllim të transpozojë rregulloren e Parlamentit Europian dhe të Këshillit të vitit 2018 “mbi shërbimet e dërgesave të pakove postare ndërkufitare” dhe është parashikuar në Planin Kombëtar të Integrimit Europian për vitin 2021”, thuhet në projektvendimin e MIE-s.
Sipas projektvendimit, të gjithë ofruesit e shërbimeve postare që ofrojnë shërbimin e dërgesave të pakove/kolive paraqesin në AKEP informacionin lidhur me emrin, statusin dhe formën ligjore, numrin e identifikimit të subjektit në regjistrin e biznesit, adresën dhe detajet e kontaktit të personit të kontaktit, karakteristikat, dhe kur është e mundur një përshkrim të detajuar, të shërbimeve të ofruara për dërgesat e pakove.
Nëse informacioni është depozituar më parë në AKEP, atëherë ofruesit e shërbimeve të dërgesave të pakove/kolive duhet të njoftojnë AKEP për çdo ndryshim të informacionit të dhënë brenda 30 ditëve nga momenti i ndryshimit.
Të gjithë ofruesit e shërbimeve të dërgesave të pakove/kolive, brenda datës 30 qershor të
çdo viti kalendarik, duhet të dërgojnë në AKEP informacionin mbi të ardhurat vjetore nga shërbimet e dërgesave të pakove për vitin kalendarik paraardhës, të ndarë në shërbime të dërgesave të pakove të brendshme dhe të pakove ndërkufitare në dalje dhe në hyrje.
Po ashtu, numrin e personave të cilët kanë punuar për ta gjatë vitit kalendarik paraardhës, të përfshirë në shërbimet e dërgesave të pakove, si numrin e pakove të përpunuara gjatë vitit kalendarik paraardhës, si dhe kur është e disponueshme, listën e çmimeve të aksesueshme publikisht, për shërbimet e dërgesave të pakove/kolive, të aplikueshme nga data 1 janar e çdo viti. /j.p/r.e/
