TOKIO, 6 janar /ATSH-AA/ – Shitja e automjeteve të reja në Japoni vitin e kaluar ka arritur nivelin më të ulët që nga viti 2011.
Unioni i Tregtarëve të Automjeteve në Japoni (JADA) në raportin vjetor të publikuar vuri në dukje se shitjet e automjeteve të reja në vitin 2020 kanë rënë për 11,5 % në krahasim me një vit më parë.
Megjithëse industria e automjeteve pa një rimëkëmbje afatshkurtër pas gjendjes së jashtëzakonshme që përkoi me periudhën prill-maj, kompanitë japoneze pësuan humbje të shitjeve gjatë gjithë vitit.
Sipas raportit, prodhuesit e automjeteve shitën 4.598.615 automjete të reja në të gjithë vendin vitin e kaluar, duke përfshirë mini makina me vëllime të motorëve deri në 660 cc. Nëse nuk përfshihen automjetet mini, shitjet u ulën me 12,3 % në 2 880 527.
Krahasuar me vitin e kaluar, Toyota pa një rënie prej 5,8 % të shitjeve, ndërsa rivalët e saj përjetuan humbje me përqindje dyshifrore. Në të njëjtën periudhë, Mitsubishi pësoi humbje prej 41,3 % dhe Nissan 27,5 %.
Në recesionin ekonomik të vitit 2011, kur ndodhi katastrofa e tërmetit dhe cunamit në verilindje të vendit, shitjet ranë me 15,1 % dhe 4.210.000 automjete të reja ishin shitur në të gjithë vendin. /os/
