PEKIN, 1 janar /ATSH-AA/ – Qendra Kineze për Kontrollin dhe Parandalimin e Sëmundjeve njoftoi se varianti i ri i koronavirusit (COVID-19) i cili u shfaq në Britaninë e Madhe dhe përhapet më shpejt është zbuluar edhe në Shangai.
Pacientja 23-vjeçare është rasti i parë i zbuluar në Kinë me këtë mutacion të virusit.
Autoritetet njoftuan se pacientja e infektuar me virusin u kthye nga Britania më 14 dhjetor dhe se është kryer hetim për të identifikuar njerëzit me të cilët ajo ka kontaktuar.
Varianti më i transmetueshëm i COVID-19 i shfaqur në Britaninë e Madhe është zbuluar në të paktën 18 vende të tjera deri më tani.
Shumë vende, përfshirë Kinën dhe Turqinë, kanë pezulluar udhëtimet me Britaninë e Madhe.
Deri më tani, në Kinë janë diagnostikuar 87 052 raste me COVID-19, ndërsa 4 634 persona kanë humbur jetën./ a.jor.
