TIRANË, 17 dhjetor/ATSH/ Komisioneri Shtetëror i Zgjedhjeve, Ilirjan Celibashi, zhvilloi sot seancën publike për verifikimin e funksionarit publik Armand Halit Rama, me funksion këshilltar në këshillin e bashkisë Tiranë.
Sipas njoftimit të KQZ-së, seanca u zhvillua për shqyrtimin e projektvendimit, “Për shqyrtimin e rezultatit të verifikimit të Prokurorit të Përgjithshëm për funksionarin publik, Armand Halit Rama, me funksion këshilltar në këshillin e bashkisë Tiranë, në zbatim të ligjit nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”.
Pas kërkesës së të interesuarit, Armand Rama, Komisioneri Celibashi vendosi shtyrjen e seancës për të martën e ardhshme. /k.s/j.p/r.e/
