FDA autorizon përdorimin e antitrupave sintetikë kundër Covid-19 të ”Regeneron”

UASHINGTON, 22 nëntor /ATSH-AFP/ – Agjencia amerikane e Ushqimit dhe Barnave (FDA) dha autorizimin emergjent për trajtimin me antitrupa sintetikë kundër Covid-19 nga kompania ”Regeneron”, veçanërisht e përdorur për të trajtuar presidentin, Donald Trump.

Ky ndryshim vjen pasi administrimi i REGEN-COV2, një kombinim i dy antitrupave të bërë në laborator, ka treguar se zvogëlon numrin e shtrimeve në spital në lidhje me Covid-19.

“Lejimi i këtyre terapive me antitrupa monoklonale mund t’i lejojë pacientët të shmangin shtrimin në spital dhe të lehtësojnë barrën në sistemin tonë të kujdesit shëndetësor”, tha zyrtari i FDA-së, Stephen Hahn.

Presidenti i ”Regeneron”, Leonard Schleifer siguroi se ky vendim ishte “një hap i rëndësishëm në luftën kundër Covid-19, sepse pacientët me rrezik të lartë në Shtetet e Bashkuara të Amerikës do të kenë akses në një terapi premtuese në fillim të infeksionit të tyre”.

Në fillim të tetorit,  Trump kishte marrë këtë koktej të antitrupave “monoklonal” të zhvilluar nga kompania amerikane ”Regeneron”, të cilën e kishte vlerësuar gjerësisht pas shërimit.

Këta antitrupa imitojnë atë që bën sistemi imunitar pas infektimit me koronavirusin, duke bllokuar majën e virusit që e lejon atë të bashkohet dhe të depërtojë në qelizat njerëzore./ a.jor.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.