NJU JORK, 20 tetor /ATSH-DPA/ – Kompania “Microsoft” njoftoi sot se po zgjeron platformën e saj “cloud”, Azure, në hapësirë.
“Po punojmë për ta bërë “Azure Space” platformën dhe ekosistemin e zgjedhur për nevojat e misionit të komunitetit hapësinor, duke synuar ta bëjmë lidhjen hapësinore dhe llogaritjen gjithnjë e më të arritshme”, tha gjiganti i programeve kompjuterike.
Në një postim në blog, “Microsoft” tha se do të jetë partner me kompaninë hapësinore amerikane SpaceX, të udhëhequr nga miliarderi i teknologjisë, Elon Musk.
“Partneriteti me SpaceX do të sjellë aftësi të reja të rrjetit për klientët e tij, shumë prej të cilëve veprojnë në mjedise të largëta dhe e kanë të vështirë të ecin me hapin e nevojave të tyre të shtuara për qasje në të dhëna dhe gjerësi bande”, shtoi “Microsoft”./ /ervo/
