BRUKSEL, 14 tetor /ATSH-DPA/ – Bashkimi Europian ka rënë dakord të sanksionojë gjashtë individë dhe një organizatë nga Rusia për helmimin e disidentit të njohur, Alexei Navalny, theksuan diplomatët e BE.
Marrëveshja erdhi në një takim të ambasadorëve të BE në Bruksel dhe pas vendimit për të filluar sanksionet e reja që u morën nga ministrat e Jashtëm të bllokut.
Ngrirja e aseteve dhe ndalimet e udhëtimit duhet të finalizohen me procedurë të shkruar dhe mund të zbatohen brenda disa ditësh.
Navalny, një kritik i ashpër i presidentit rus Vladimir Putin dhe një aktivist i shquar antikorrupsion, u helmua gjatë një fluturimi të brendshëm në Siberi në 20 gusht dhe u dërgua në Gjermani ku qëndroi në koma disa ditë. /os/
