TIRANË, 16 shtator/ATSH/ Autoriteti i Aviacionit Civil zhvilloi një auditim pranë Albcontrol, ofruesit të shërbimeve të navigimit ajror në vendin tonë në fushat e shërbimeve meteorologjike informacionit aeronautik.
Sipas AAC-së, në fokusin e auditit ishin përputhshmëria me rregullat dhe standardet e anekseve te ICAO-s dhe rregulloreve të Bashkimit Europian për këto shërbime.
“Siguria në fushën e navigimit ajror është në fokusin e përhershëm të aktivitete të Autoritetit të Aviacionit Civil Shqiptar. Në mënyrë të veçantë shërbimet e meteorologjisë dhe të informacionit aeronautik, kanë një rëndësi të madhe në fazat të ndryshme të fluturimit të avionëve, të cilët herë pas here kërkojnë të dhëna nga këto shërbime për mbarëvajtjen dhe kryerjen e sigurtë të fluturimit”, thuhet në deklaratën e AAC-së.
Shërbimet e ofruara nga Albcontrol janë bazuar në procedura dhe standarde sipas rregullave të mirëcaktuara si dhe karakterizohen nga përpjekje të vazhdueshme për ti përmirësuar dhe zhvilluar më tej.
Sipas AAC-së, qëllimi i këtyre auditeve periodike është rritja e nivelit të sigurisë dhe përmirësimi i vazhdueshëm i shërbimeve në Aviacionin Civil Shqiptar në përputhje me standardet ndërkombëtare. /a.gjonaj//a.a//r.e/
