BERLIN, 2 shtator /ATSH-DPA/ – Ka prova pa mëdyshje që disidenti rus Alexei Navalny u helmua me një agjent nervor kimik nga grupi Novichok, tha sot zëdhënësi i qeverisë gjermane, Steffen Seibert.
“Ky është një përfundim i dalë nga testi toksikologjik i kryer në një laborator të veçantë të ushtrisë gjermane, Bundeswehr”, tha Seibert në një deklaratë.
“Është një ngjarje tronditëse që Alexei Navalny është bërë viktimë e një sulmi me një agjent nervor kimik në Rusi”, vazhdoi ai, duke shtuar se kancelarja Angela Merkel është informuar për gjetjet.
Navalny, 44 vjeç, u dërgua në Berlin për mjekim më 22 gusht, dy ditë pasi u sëmur gjatë një fluturimi të brendshëm në Rusi.
Ai ka qenë një nga kundërshtarët më të ashpër të presidentit rus, Vladimir Putin, gjatë dekadës së kaluar.
Seibert i bëri sërish thirrje Rusisë që të kryejë një hetim mbi incidentin./ /ervo/
