ATHINË, 28 gusht /ATSH-AFP/ – Greqia njoftoi sot zgjatjen deri më 15 shtator të periudhës së izolimit për kampet e migrantëve në pikat hyrëse në Europë, në ishuj dhe në kufirin tokësor të vendit, i cili po përjeton një ringjallje të rasteve të COVID-19.
“Izolimi i kampeve, që hyri në fuqi më 21 mars, do të zgjatet deri më 15 shtator, për të parandaluar shfaqjen dhe përhapjen e rasteve të koronavirusit”, njoftoi Ministria e Migracionit.
Prania e më shumë se 24 000 azilkërkuesve në kampe josanitare, me një kapacitet pritjeje më pak se 6 100 vende, të vendosura në pesë ishujt e Detit Egje, është një burim shqetësimi për autoritetet.
Edhe ardhjet e reja në ishujt grekë i nënshtrohen karantinës në struktura të veçanta, në mënyrë që të mos rrezikohet ndotja e të gjithë kampit.
Greqia, me 254 vdekje nga COVID-19, nuk është prekur aq rëndë sa vendet e tjera europiane dhe nuk ka regjistruar viktima në kampet e migrantëve./ /ervo/
