BERLIN, 21 korrik /ATSH-AFP/ – Presidentja e Bankës Qendrore Europiane (BQE), Christine Lagarde përshëndeti sot miratimin e një plani historik rimëkëmbjeje të ekonomisë europiane përballë krizës së koronavirusit, shenjë, sipas saj, e një BE-je që bashkohet dhe progreson.
“Marrëveshja e miratuar sot nga Këshilli i Europës tregon që, kur kjo është e nevojshme, BE bashkohet dhe progreson për të ndihmuar popujt europianë”, theksoi Largarde në një mesazh në Twitter.
Ajo falenderoi drejtuesit europianë për rezistencën dhe vendosmërinë e këtyre ditëve të fundit dhe theksoi se Bashkimi Europian mund të luftojë efektet ekonomike të kësaj pandemie vetëm duke punuar së bashku.
Krerët e shteteve dhe qeverive të 27 vendeve anëtare të BE-së miratuan sot një paketë historike stimulimi prej 750 miliardë eurosh për të mbështetur ekonomitë e tyre të goditura nga kriza e koronavirusit, bazuar për herë të parë në një borxh të përbashkët.
Deri tani, BQE ka qenë në linjën e parë në nivel europian për të mbështetur ekonomitë e Unionit.
Instituti monetar i Frankfurtit ka zhbllokuar këto muajt e fundit në total 1 350 miliardë euro për blerjet e borxheve në tregje, të cilat duhet të zgjasin deri në qershor 2021./ /ec/
