Rënie e ndjeshme e temperaturave/ Reshje shiu dhe dëbore gjatë gjithë ditës

TIRANË, 1 prill/ATSH/ I gjithë vendi ynë sot është përfshirë nga reshjet e shiut dhe dëborës në zonat malore, ndërsa është shoqëruar edhe me uljen e temperaturave.

Edhe pse jemi në stinën e pranverës në Alpe e verilindje reshjet e dëborës janë të dendura në këto zona.

Dëbora ka zbardhur disa qytete dhe zona të vendit si në Kukës, Pukë, Tropojë, Shkodër, Has, Bulqizë, Mat, etj.

Shqipëria prej gati tri javësh ndodhet në izolim për shkak të parandalimit të përhapjes së COVID-19.

Gjatë ditës së sotme në rrugët e qyteteve kryesore ka shumë pak lëvizje për shkak edhe të motit të keq.

Sipas Shërbimit Meteorologjik Ushtarak me rënien e ndjeshme të temperaturave gjatë ditës reshjet e dëborës do të përfshijnë lartësitë fushore ne rajonin verior. Në lindje e juglindje reshjet e dëborës nisin prej orëve të paradites deri në lartësitë 500-600 metra me intensitet deri mesatar. Në mbrëmje reshjet e shiut e dëborës ndërpriten, për ti lënë vendin kthjellimeve. /k.s/j.p/r.e/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.