TEHERAN, 14 janar /ATSH-AFP/ – Presidenti iranian, Hassan Rohani theksoi sot se vendi i tij duhet të ndëshkonte të gjithë përgjegjësit e katastrofës ajrore të Boeing-ut ukrainas, i rrëzuar gabimisht nga një raketë iraniane më 8 janar pranë Teheranit duke shkaktuar vdekjen e 176 pasagjerëve në bord.
“Për popullin tonë, është shumë e rëndësishme që në këtë aksident kushdo që ka faj apo ka neglizhuar të ndiqet penalisht”, theksoi ai në një fjalim televiziv duke shtuar se të gjithë fajtorët duhen ndëshkuar.
“Sistemi gjyqësor duhet të formojë një gjykatë speciale me gjyqtarë të rangut të lartë dhe dhjetëra ekspertë (…) mbarë bota do të shikojë”, shtoi Rohani.
Pasi Irani përgënjeshtroi hipotezën sipas të cilës avioni i linjës “Ukraine International Airlines” mund të ishte goditur nga një raketë iraniane, forcat e armatosura iraniane pranuan të shtunën përgjegjësinë në këtë dramë duke e cilësuar si një gabim njerëzor./ /ec/
