TIRANË, 30 tetor /ATSH/ -Polonia ka dhuruar 180,000 euro për Zyrën Rajonale të Bashkëpunimit Rinor (RYCO).
Marrëveshja e dhurimit u nënshkrua në Tiranë nga Sekretari i Përgjithshëm i RYCO, Đuro Blanuša dhe Wiesław Tarka, koordinatori i Samitit të Ballkanit Perëndimor në Poznań dhe gjithashtu përfaqësues i Ministrisë së Punëve të Jashtme të Republikës së Polonisë, ëbn të ditur zyra për shtyp e RYCO.
Dhurimi në vlerë prej 180,000 euro vjen pas pjesëmarrjes së suksesshme të RYCO në Samitin e Poznan në korrik të këtij viti, ku u theksua dhe u vlerësua përparimi i bërë nga RYCO si dhe rëndësia e misionit të RYCO për të mbështetur shkëmbimin rajonal të të rinjve në Ballkanin Perëndimor.
Dhurimi synon të kontribuojë në kapacitetet e përgjithshme të RYCO në zbatimin e aktiviteteve në fushën e bashkëpunimit të të rinjve në Ballkanin Perëndimor. Aktivitetet do të kryhen nga RYCO në bashkëpunim të ngushtë me partnerë të shumtë në nivelin rajonal dhe Palët Kontraktuese.
Zyra Rajonale e Bashkëpunimit Rinor (RYCO) është një organizatë ndërqeveritare e themeluar nga qeveritë e Ballkanit Perëndimor: Shqipëria, Bosnja dhe Hercegovina, Kosova, Mali i Zi, Maqedonia e Veriut dhe Serbia, me qëllim promovimin e frymës së pajtimit dhe bashkëpunimit midis të rinjve në rajon përmes programet e shkëmbimit të të rinjve.
Marrëveshja për krijimin e RYCO u nënshkrua nga Kryeministrat e 6 vendeve të Ballkanit Perëndimor gjatë Samitit të Ballkanit Perëndimor të mbajtur në Paris më 4 korrik 2016.
/gj.mima//j.p/
