TIRANË, 26 tetor/ATSH/ Lufta kundër informalitetit do të fokusohet edhe tek pagat.
Drejtoresha e Përgjithshme e Tatimeve, Delina Ibrahimaj e ftuar në një studio televizive bëri të ditur se janë identifikuar 7200 kompani që deklarojnë paga më të ulëta sesa në realitet paguajnë punonjësit e tyre.
Në total, janë 13400 individë të identifikuar si të nënpaguar në bazë të profesioneve të tyre.
“Ka inxhinierë dhe ekonomistë që ne supozojmë se paguhen më pak sesa deklarimet e tyre. Janë njoftuar me letra dhe ne do të shkojmë ti kontrollojmë nga më të mëdhenjtë te më të vegjlit, në mënyrë që kjo dukuri shqetësuese jo vetëm për mbledhjen e të ardhurave e uljen e informalitetit, por edhe për të ardhmen e vet individëve të zhduket”, tha Ibrahimaj.
Sa i takon kontrolleve për deklarimin e punonjësve, drejtoresha e Tatimeve shpjegoi se si po zhvillohen inspektimet.
“Do të verifikohen të gjithë subjektet të cilët janë pa të punësuar dhe me 1-10 persona të punësuar. Kjo nuk do të thotë se në vitin që vjen punësimet nuk do të kontrollohen edhe te subjektet e tjera”.
/a.gjonaj/ /a.g/
