TIRANË, 21 qershor/ATSH/ Kryetari i bashkisë së Fierit, Armando Subashi, i cili rikandidon për një mandat të dytë në 30 qershor, vijoi sot takimet elektorale me banorët e fshatrave Zhupan, Vadhizë, Rom e Drizë.
“Ajo çfarë është bërë deri tani në këto fshatra, ku ka ndryshuar pothuajse krejtësisht stili i jetesës, nuk është asgjë me ato që do të bëjmë në 4 vitet e ardhshme”, tha Subashi.
Ndër prioritetet e bashkisë për këto fshatra, Subashi renditi rrugën e takodromit, në Zhupan, një gangrenë 20 vjeçare për fermerët e zonës; rrugën nga Kosovarët-Lagja Hoxhë në Zhupan; rrugët e lagjeve, hapjen e çesmave publike dhe ndriçimin e Fshatit Rom; rikonstruksionin e 49 banesave të komunitetit rom në Fshatin Rom; shtrimin e rrugës dhe disiplinimi i ujrave të shiut të rrugës nga Metohasim- Fshat; shtrimin e rrugës së Varrezave të Vadhizës”.
Po ashtu, Subashi u angazhua për vazhdimin e rikonstruksionit të rrugëve të brendshme të fshatrave, hapjen e tokave të parcelave të fermerëve dhe vazhdimin e ndriçimit publik në të gjithë zonën./m.m/j.p/.
