TIRANË, 2 maj/ATSH/ – Deputetja e Partisë Socialiste, Mirela Kumbaro ka reaguar pas protestës së zhvilluar nga ana e partive opozitare, ku u bllokuan për 2 orë disa nga aset kryesore rrugore në vend, duke paralizuar qarkullimin e automjeteve.
Sipas deputetes socialiste të qarkut të Gjirokastrës, bllokimi i Urës së Leklit, e cila është edhe kthesa që ndan Përmetin nga Tepelena dhe Gjirokastra, është bërë nga punonjësit e bashkisë së Përmetit, të cilët sipas saj janë urdhëruar.
“Ura e Leklit është kthesa që ndan Përmetin nga Tepelena dhe Gjirokastra. Këtu e ka mbledhur PD-ja qarkun e Gjirokastrës për të bllokuar rrugën. Ç’të thuash… Urdhërohen burrat që punojnë në bashkinë e Përmetit që të mblidhen te ura e Leklit për “të bllokuar” rrugën, se ashtu është një punë…
Nga kryebashkiaku që duhet të ishte më i interesuar se kushdo tjetër që turistët të kthehen në Përmet! Ndjesë turistëve e vizitorëve të zonës më të bukur të Shqipërisë që kanë rezervuar këto ditë gjithë hotelet e Gjirokastrës e Përmetit dhe përshkojnë pikërisht këtë aks. Përmeti, Tepelena e Gjirokastra janë shumë më të bukura se kjo pamje, ju e dini, siç e dinë dhe të gjitha bizneset turistike që ju mirëpresin e ju sajdisin në këtë Qark me histori, kulturë e natyrë të jashtëzakonshme!”, shprehet Kumbaro.
/e.caushi/
