TIRANË, 20 mars /ATSH/ – Dita Botërore e Shëndetit të Gojës, e vendosur nga Federata Dentare Botërore, organizohet çdo vit në 20 mars.
Kjo ditë synon të rrisë ndërgjegjësimin, si dhe të tregojë rëndësinë e madhe që ka shëndeti oral në shëndetin e përgjithshëm dhe mirëqenien. Higjiena e mirë e gojës është shumë e rëndësishme, sepse favorizon një shëndet të mirë.
“Kujdesu për shëndetin e gojës! Mbro shëndetin tënd” është mesazhi i këtij viti, i cili motivon individët të marrin përgjegjësinë për shëndetin e tyre oral, duke ndërmarrë veprime specifike për të parandaluar sëmundjet orale dhe për të mbrojtur shëndetin e tyre të përgjithshëm.
Sipas Institutit të Shëndetit Publik, parandalimi është gjithmonë opsioni më i mirë, por zbulimi dhe trajtimi i hershëm gjithashtu janë vendimtare për të siguruar rezultatet më të mira kundër sëmundjeve orale, si dhe ndërlikimet e lidhura me shëndetin. /j.p/
