TIRANË, 16 mars/ASH-Maela Marini/ Deputetja e Partisë Socialiste, Vasilika Hysi deklaroi sot se “kjo është një protestë e opozitës dhe nuk është protestë e qytetarëve dhe e popullit, sepse shumica e njerëzve nuk duan dhunë”.
E ftuar në një studio televizive, Hysi tha se “sot të gjithë kanë të drejtë të protestojnë, por shumica e qytetarëve nuk i mbështet protestat e dhunshme”.
“Sot një pjesë e mirë e investimeve publike në Tiranë janë shkatërruar. Pashë se çfarë dëmi është bërë në bulevard dhe ato paguhen nga taksapaguesit”, tha Hysi.
Ajo vlerësoi veprimin e Policisë së Shtetit në të gjitha protestat e organizuara. “Policia e Shtetit asistohet nga policia europiane dhe është e trajnuar dhe e specializuar. Të gjitha veprimet e Policisë kanë treguar shkallën e profesionalizmit dhe mosprovokimit”, tha Hysi.
Sipas saj, “është e domosdoshme që të bëhet një analizë se çfarë dëmi i është bërë ekonomisë shqiptare pas datës 16 shkurt, dhe si kanë rënë të ardhurat e biznesit”.
“Protesta e opozitës ka dëmtuar ekonominë, ka ulur ritmet e zhvillimit të saj, ka dëmtuar turizmin dhe biznesin dhe ka ulur ritmet e integrimit europian, pasi nuk e dimë akoma se çfarë pasojash do të ketë në çeljen e negociatave”, tha Hysi.
Sipas saj, “kjo protestë e dhunshme nuk përfaqëson opozitarin e ndershëm”.
